Guddoomiyaha Xisbiga Kulmiye Muuse Biixi Cabdi oo jawaab qumman siiyey Sheekh Shariif

Guddoomiyaha xisbiga talada dalka haya ee Kulmiye Muuse Biixi Cabdi ayaa fariin u diray Madaxwaynaha dawlada ku meel-gaadhka ah ee Somaliya Sheekh Shariif Sheekh Axmed iyo odayaasha dhaqanka ee ku shiraya Magaaladda Muqdisho:

Guddoomiye Muuse Biixi Cabdi, waxa uu sheegay in Madaxwaynaha Somaliya Sheekh Shariif Sheekh Axmed uu ku celceliyo midnimada Somaliya, balse waxa uu tilmaamay in reer Somaliya hore u aaseen Midnimada ay Somaliland ka doonayaan.


Muuse Biixi Cabdi oo maanta ka hadlayey Munaasibad xisbiga Kulmiye ku soo dhaweeyay Musharaxa ka mid ah Musharixiinta uga qayb-galaya doorashada deegaanka Caasimada Hargeysa ayaa waxa uu sheegay inay beesha caalamka iyo dawlada Sheekh Shariifba cod dheer ugu sheegayaan inay midnimada Somaliya hore u aaseen, isaga oo tilmaamay inay isticaalayaan weedhii Marxuum Cigaal ka sheegay shirkii Somaliya loogu qabtay 1993-kii, taasi oo ahayd inay bogsatay halkii xanuuni jirtay marka loo qaado heesta “Somaliyey toosaa oo isku tiirsada”

Guddoomiye Muuse oo arimahaasi ka hadlayana waxa uu yidhi “Sheekh Shariif shalay oo dhan waxa uu akhriyayey khudbad ah in Somaliya la mideeyo, waxaanu adduunka cod dheer ugu sheegaynaa eraygii Maxamed Xaaji Ibraahim Cigaal ka yidhi shirkii Addis Ababa 1993-kii markii loo qaaday heestii ahayd “Somaliyey toosoo isku tiirsada” ee uu yidhi halkii I xanxantoon jirtay maanta I xanxantoon-mayso oo way I engagtay”

Guddoomiye Muuse Biixi Cabdi, waxa uu fariin toos ah u diray Madaxwayne Sheekh Shariif “Markaa Shariifka iyo inta shiraysa waxaanu leenahay midnimada Somaliland laga doonayo waydinkii aasay”ayuu yidhi.

Hadalka Guddoomiye Muuse Biixi ayaa imanaya malin ka dib markii Madaxwayne Sheekh Shariif hadal uu ka jeediyay madasha ay ku shirayaan odayaasha dhaqanka ee Magaaladda Muqdisho uu ku sheegay inay ka shaqeynayaan midnimada Somaliya.

Comments are closed.